فیلڈر نے سن گلاسز (عینک) آنکھوں پر لگانے کے بجائے اپنے سر پر پہنی کیپ پر سجا رکھی تھی اور یہی بات محمد عامر کو مزید غصے میں مبتلا کر گئی

لندن (سٹی نیوز) کرکٹ میچ کے دوران کسی فیلڈر سے کیچ چھوٹ جائے تو باؤلر کو شدید غصہ آتا ہے اور پاکستانی باؤلر محمد عامر اس معاملے میں خاصے پرجوش اور غصیلے ثابت ہوئے ہیں۔
چیمپینز ٹرافی میں بھارت کیخلاف فائنل میچ میں جب اظہر علی نے ان کی گیند پر کیچ چھوڑا تھا تو ان کا غصہ پوری دنیا نے دیکھا تھا لیکن اب ایک غیر ملکی کرکٹر بھی کیچ چھوڑنے پر ان کے ’عتاب‘ کا شکار ہو گیا ہے۔
محمد عامر کاؤنٹی کرکٹ کے ایک میچ میں باؤلنگ کروا رہے تھے کہ بلے باز نے اونچا شاٹ کھیلا جو باؤنڈری کی جانب گیا لیکن فیلڈر نے حیران کن طور پر اپنی جگہ سے حرکت ہی نہ کی جس پر کمنٹیٹرز حیران رہ گئے اور محمد عامر غصے میں آ گئے۔
انہوں نے اپنا ہاتھ زور سے زمین پر مارا اور فیلڈر کی جانب دیکھ کر چلانے لگے جس پر فیلڈر نے اشارہ کیا کہ آنکھوں میں سورج کی کرنیں پڑنے کے باعث انہیں گیند نظر نہیں آیا۔
اس پر عامر کو اور بھی غصہ آ گیا کیونکہ اسی فیلڈر نے سن گلاسز (عینک) آنکھوں پر لگانے کے بجائے اپنے سر پر پہنی کیپ پر سجا رکھی تھی اور یہی بات محمد عامر کو مزید غصے میں مبتلا کر گئی۔
انہوں نے غصیلے انداز میں ہی فیلڈر کو دوبارہ اشارہ کیا کہ سن گلاسز اپنی آنکھوں پر سجاؤکیونکہ یہ اسی مقصد کیلئے ہیں۔ ان کی یہ ویڈیو سوشل میڈیا پرخوب وائرل ہو رہی ہے جسے دیکھ کر لوگوں کو عامر کی حالت پر افسوس ہوتا ہے جبکہ فیلڈر کو دیکھ کر ہنسی نکل جاتی ہے۔

اپنا تبصرہ بھیجیں